Ka Moe a Rangi Raua ko Papa

 

Na, ko Rangi-nui, e tu iho nei, ka hiahia ki a Papa-tu-a-nuku e tiraha ake ana te puku ki runga ; ka hiahia iho ia hei wahine mana. Ka heke iho a Rangi ki a Papa-tu-a-nuku. I taua wa ko te maramatanga, he maramatanga po-kutikuti kakarauri nei te ahua ; kaore hoki he ra, he marama, he whetu, he kapua, he ao, he kohu ranei, he kotaotao wai, rangi ranei. Na, ka moea e Rangi-nui a Papa-tu-a-nuku i konei hei wahine mana.

Ka hikaia e Rangi-nui ko nga otaota hei taupaki mo te aroaro o Papa-tu-a-nuku, mo nga keke, mo te upoko, mo te tinana. I muri i tenei ko Rakauriki hei tupuru mo raua ko te wahine. I muri o tenei ko te Rakau-tu i te wao nui. Ka tangi te ahuru i konei ki a Papa-tu-a-nuku. Katahi ka mahana. Ka kauawhiawhi mai te mahana, ka makaia ko te aitanga pepeke, ko te aitanga pekepeketua, hei whakaatu mo roto i te otaota i te hurupuia i te Wao-tu-rangi. Ka makaia ko te papaka, ko te toitoi, ko te pipi, ko te ngakihi, ko te kuku, ko te paua, me era atu mea pera, he anga nei o ratou, hei whakapai i nga wai. He nui nga kupu korero kei konei. Kaati nei aku e tatai atu ki a koe. Ma to tuakana papa e korero ki a koe, ma Moihi te Matorohanga, koi he i au.

I muri o nga mea katoa e whakatao ai a Rangi-nui ra ko Papa-tu-a-nuku katahi ka whakaahuatia tona whanau ki nga whatu te tuatahi. (Ka) oti tera ka tahi ka mahia te whare mo nga whatu ; ko ia te upoko. Ka oti te upoko, ka takoto te tahu pokohiwi, me nga tokotu, me ona wahi katoa, i tona ahua i tona ahua, i tona tipu i tona tipu, ahua pipi, ngawari, ngohengohe, i te mea e popoki ana a Rangi-nui i runga i a Papa-tu-a-nuku. Ko ia e kore ai e pakari te tipu o nga mea katoa, i kore ai e hua nga mea katoa, e kautere noa iho ana hoki i roto i te ao pouri. Ko ia tenei to ratou ahua.

Ko etahi e koropuku ana, ko etahi e whakamatika ana ; ko etahi e wharo ana, ko etahi e kopae ana ; ko etahi e tapapa ana, ko etahi e tiraha ana ; ko etahi e korotuohu ana, ko etahi e tupou ana ; ko etahi e pepeke ana, ko etahi e awhi ana ; ko etahi e ko ana, ko etahi e tuturu ana ; ko eatahi e whana ana, ko etahi e tu ana ; ko etahi e mapu ana, ko etahi e whawha ana ; ko etahi e whakamatikatika ana, ko etahi e tirotiro ana, ko etahi e noho ana ; me era atu tini o o ratau ahua i roto i te awhi a Rangi-nui raua ko Papa-tu-a-nuku.

Na ko ia tenei te rarangi ingoa o te whanau a Rangi raua ko Papa-tu-a-nuku:-

  • Uru-te-Ngangana
  • Roiho
  • Roake
  • Haepuru
  • Haematua
  • Whiro-te-tipua
  • Tawhirimatea
  • Tangaroa-whakamautai
  • Kiwa
  • Tumatauenga
  • Te Iroa
  • Punaweko
  • Rangarangaihi-matua
  • Rongo-maraeroa
  • Raka-maomao
  • Tawhiri-rangi
  • Rua-taumata
  • Mauhii
  • Hurumanu
  • Uepoto
  • Te Kuwatawata
  • Peketua
  • Rongowhakaata
  • Toro-i-waho
  • Kekerewai
  • Kaupeka
  • Te Akaaka-matua
  • Te Arawaru
  • Tu-kapua
  • Tongatonga
  • Tane-te-hokowhitu
  • Te Puwhakahara
  • Ueroa
  • Kewa
  • Taka-urunga
  • Paerangi
  • Taiepa
  • Tuamatua
  • Tiwhaia
  • Turamarama-a-nuku
  • Tumata-kaka
  • Nganangana-a-Rangi
  • Tane
  • Tu-pai
  • Whakaruaumoko

Anei ano etahi, kaore nei i taweke ake i au. Waiho ma taua hoki e ata whakaraupapa ake a ona wa. Kei te whitiwhiti taku whakapapa i te whanau nei. Hokowhitu takitahi te whanau nei to ratau tatau. He tane anake te whanau nei.

No ka noho te whanau nei, ko ia tera ta ratau noho i kiia ake nei e au.

 

previous | contents | next